Бетюнская сельская библиотека

Быйыл биллиилээх поэт Ефрем Степанович Сивцев -Таллан Бүрэ төрөөбүтэ 115 сылын туолла.Бу кэрэ бэлиэ даатаҕа анаан, Бөтүҥ олохтоох библиотеката Таллан Бүрэ стипендиаттарын туһунан билиһиннэрэр сыаллаах бырайыагын чэрчитинэн, ахсынньы 18-19 күннэригэр С.П.Оконешников аатынан «Айылгы» культура киинигэр, Намнааҕы оҕо искусствотын оскуолатын ойуулуур — дьүһүннүүр салаатын үөрэнээччилэрин «Тахсар саһарҕа кэрэтэ» уруһуйдарын быыстапката көрдөрүүгэ турда.

Быыстапкаҕа кыттыбыт 22 үөрэнээччини уруһуй кэрэ эйгэтигэр,
поэт Таллан Бүрэ 1997 сыллааҕы стипендиата Яна Кимовна Христофорова уһуйар, үөрэтэр.

Яна Кимовна үөрэнээччилэрэ ис сүрэхтэриттэн кыһаллан, кыһамньыларын ууран туран уруһуйдаабыт уруһуйдара көрөөччүлэр болҕомтолорун тарта, дьон сэҥээриитин ылла.

Айар куттаах үөрэнээччилэргэ, кинилэр салайааччыларыгар Яна Кимовнаҕа инникитин да айар талааннара сайда, дьоннорун сэргэлэрин үөрдэ туралларыгар баҕарабыт!