Бетюнская сельская библиотека

Бөтүҥ нэһилиэгин Семен Петрович Оконешников аатынан «Айылгы»культура киинигэр аҕам саастаах дьоммутугар анаммыт декаданы түмүктүүр, Россияҕа Аҕа, Сахабыт сиригэр Ийэ күнүн көрсө «Ис сүрэхтэн» диэн истиҥ тэрээһин буолан ааста.

Тэрээһини эҕэрдэ тылынан арыйда «Бөтүҥ нэһилиэгэ»МТ баһылыгын солбуйааччы Галина Маркова. Бу дьоро күнүнэн мустубут дьоҥҥо ылбаҕай ырыатынан эҕэрдэтин тиэртэ —  культура киинин директора Михаил Макаров.

Бу күн күндү ыалдыттарынан буоллулар: быйыл тэриллибитэ 30 сылын бэлиэтиир
“Далбар Хотун” сурунаал редакциятын үлэһиттэрэ.

Сурунаал үлэтин туһунан билиһиннэрдэ — прозаик, сурунаал бас редактора Айталина Никифорова. Салгыы сурунаал дьоруойа, норуот эмчитэ Валентина Попова Саха сирин эмтээх отторун туһунан кэпсээтэ, бэйэтэ хомуйан оҥорбут эмтэрин көрдөрөн сүбэ-ама биэрдэ.

Бу күн чэпчэтиилээх сурутуу ыытылынна, суруппут дьон сүүйтэриитэ суох лотереяҕа оонньоон бириис тутан үөрдүлэр. Аҕам саастаах дьоммут күннэрин декадатын түмүктүүр чааска бэйэтин  эҕэрдэтин  нэһилиэк бэтэрээннэрин сэбиэтин председателэ Людмила Михайлова тиэртэ уонна үбүлүөйдээх дьоммутун эҕэрдэлээн туран бэлэхтэри туттарда. Эрдэ биллэриллибит
«Сэбиэскэй кэминээҕи мал-сал» быыстапка күрэҕин кыайыылааҕынан Юлия Маркова тахсан бирииһинэн бэлиэтэннэ. Бары тэрээһин кыттыылаахтара ыытыллыбыт күрэхтэргэ кыттан, оонньоон, үҥкүүлээн, бэйэ- бэйэлэрин кытта ирэ- хоро кэпсэтэн, алтыһан, дуоһуйа сынньанан тарҕастылар. Тэрээһини Калиса Стручкова уонна Валентина Колесова иилээн-саҕалаан ыыттылар.